MARLABA DO NA PIJOM

Cerita Lucu, "MARLABA DO NA PIJOM"

(Nigoretton ni: Bernata Manalu)

Holan Asa Mekkel do hita, dah...

Olo do gabe hassit siubeon ala ni geok ni turi – turian on, tarlobi molo ni paihut – ihut di sada video.

Taringot ma di sahalak naung tung matua, matua paling – paling on, Molo di huta nami di Pulogodang Simanullang Toruan toho di toru ni Dolok Pinapan. Asa hattus diboto hamu, huta nami on markecamatan ma tu Kecamatan Pakkat, Kabupaten Humbang Hasundutan. Dang sadia leleng dope ianggo Kabupaten nami on, dao ma umurna sian umur ni na matua na di turi – turian on. Huuduti ma muse, dai, molo nga songoni ganjang ni umur na didokdo sisongonon, “NUNGNGA PUKKUL ONOM”. Dijalo roha ma tutu I, tarsongon ari-ari ma I, molo nungnga pukkul onom on ma pardomuan ni na tiur tu na holom, digoari ma BOT NI ARI.

Mulak ma tu turi-turian on muse, ate. Ai gabe songon na patandahon hutakki idaon au, ate? Hape ido nian. Hahahaha…

Niudutan ma muse.

Ia namatua on, nungnga be adong pahoppuna. Eh pahoppu ni namatuan on nungnga adong pahoppu na. Ima !. Pahoppu na on ma laos gabe panggoaran do di ibana. Jot – jot  do digoari halak ibana, Oppu Marippot,. Ia pahoppu panggoaran na on, dijou halak do, Oppu Marsaringar.

foto dari Google

Bakko ma I di hita halak Batak, sai olo do dibaen sada ulaon, dalan mandok mauliate tu Tuhan-na, ala naung peppeng matua, situa-tua na. Isarana rupani, sada pesta ulang tahun. Nungnga leleng ditahi Oppu Marsaringar lao ambaen ulaon las ni roha I, jala nugnga dihatahon be sakkap ni roha nai tu sude pinomparna songoni nang tu sude pinompar ni Oppu Marippot. Toho ma tutu jolma na sangap Oppu Marsaringar on, sitolopi do do sude di sakkap na i.

Dapot ma mata ni ulaon I, marlas ni roha situtu ma sude nasida. Dibaen nasida do songon dalan ni siribur-ribur di ulaon I, mar uning-uningan nabalga do nasida. Torop ro akka ontangan, dongan sahuta nang ale – ale. Ribur situtu ma tahe….

Juppa ma di na pasahathon daon mauliate songon tanda ni las ni roha nasida tu Oppu Marippot. Dipatupa nasida ma sipanganon, suman idaon tu Ombus – ombus ni Siborong-borong alai adong do ra sameter par sameter balga na, Balga situtuma.

Molo di ari na parpudi on dang loja be patupahon si songoni, niula ni hepeng namai. Nga godang di akka partiga-tiga.

Dipadompak Oppu Marsaringar ma Ombus-ombus na mansai balga on tu jolo ni Oppungna Oppu Marippot i.  Taringot ma Oppu Marsaringar, 

“Didia lilin na ?”, ima di rohana.

“Bapak Marsaringar… orahon ma jo si Marsaringar, tuhor hamu jo lilin tu kue ni Amang Mangulahi mon”, di gorahon Oppu Marsaringar ma anak buha bajuna si Lipan.

“Ohhh, Olo Among..”,  Ninna Amani Marsaringar.

“Among, ai sadia do umur ni Among mangulahi on, tahe?  Ninna Amani Marsaringar patakkashon tu Amangna Oppu Marsaringar.

“Bah, ido tutu”, di dok ni Oppu Marsaringar di bagas rohana

Disukkun Oppu Marsaringar ma Oppung na I, “Oppung..Ai sadia do Umurmu ?”’

“Boha ?? dugul hu… ?”, ninna Oppu Marippot mangalusi

“Umurmu… “, Dipatakkas Oppu Marsaringar

“Adduhur hu… ?”, alus ni Oppu Marippot

Diigot Oppu Marsaringar ma naung dao parbingean ni Oppung na I (Molo hata sidanak na, “PIJOM”, ninna halak) gabe dipajonok ma lao manukkun, apala pas ma di sipareon ni Oppu Marippot.

“Umur mu nungnga sadia, Oppung ? Umur…. !!! Ai naung maol do oppung martinangi ?”

“Ohhh umur hu…. Ikkon jonok nama hamu molo naeng mangattoi au, ai dang hubege be”, (Alang humutur do begeon soara ni Oppu Marippot molo makkatai, ala nga matua)

“Ai imadah, molo hubilang bilangi do, Alana sanga do adong na mate matua najolo akka Buladda I di jolokku. Nungnga be margijjang saratus duapulu taon ra au. Ai ra salelengon nga sai di jou Tuhan I au, alai ala so hubege, dipsobbu ma”, ninna Oppu Marippot"

“Hahahhaa…..Gaukakkak..hhhehehee…hiiii…., heeee hehee….”, Mambege alus ni Oppu Maripot I, mallangak – langak ma sude natorop I mekkel, Songoni nang Oppu Marsaringar, gogo situtu ma mekkel. Ditiop imana nama siubeonna na mekkel I, hape laos dabu ibana. Gabe jumolo marunjung sian Oppung nai. (bam)